Статистика
Онлайн всего: 1 Гостей: 1 Пользователей: 0
|
Главная » 2013 » Январь » 21 » Норуоттар икки ардыларынааҕы V Волковскай ааҕыылар
10:49 Норуоттар икки ардыларынааҕы V Волковскай ааҕыылар |
 Быйыл сайын от ыйын бүтүүтэ Чувашия киинигэр Чебоксар куоракка V Волковскай ааҕыылар буолан аастылар. Бу ааҕыыларга Бүлүү улууһуттан 9, Дьокуускайтан 2, барыта 11 киһилээх делегация баран кыттан кэллэ. Делегацияҕа Бүлүү 2 нүөмэрдээх оскуолатын уонна Тоҕустааҕы тыл, кэрэ эйгэ гимназиятын учууталлара киирдилэр, салайааччынан ВСОШ 2 уонна Ороһутааҕы норуот педагогикатын түмэлин директора Чиряев Еремей Константинович сырытта. ТТКЭГ-тан директоры иитэр үлэҕэ солбуйааччы Унарова М.И., саха тылын учуутала Кондратьева С.А., директоры научнай – методическай үлэҕэ солбуйааччы Сергина З.Н. кыттынылар. Дьокуускайтан бэс ыйын 23 күнүгэр Москваҕа көтөн, салгыы поеһынан айаннаан, Чебоксарга сарсыныгар сарсыарда тиийдибит. Бу күн Чувашияҕа өрөспүүбүлүкэтээҕи «Акатуй» диэн биһиги ыһыахпытыгар майгынныыр национальнай бырааһынньыктарыгар ыҥырыылаах ыалдьыттар буолан, сахалыы таҥаспытын кэтэн кытынныбыт. Республика салалтата Волковскай ааҕыыларга улахан болҕомтотун уурар эбит. Биһиэхэ тыл биэрэннэр, Саха Республикатын аатыттан эҕэрдэ эттибит, тойугунан уруйдаатыбыт, хомуска оонньоон дьиэрэттибит. Чуваштар таҥаспытын, фольклорбутун олус интэриэһиргээтилэр, дойдубут туһунан ыйыталаһаллар, бачча ыраахтан хайдах кэлбиппитин сөҕөллөр. Бырааһынньык бүтүөр диэри маанылаах ыалдьыттар буолан, далбарга сырыттыбыт. Сарсыныгар бэс ыйын 25 күнүгэр ааҕыыларбыт салгыы Г.Н.Волков үлэлээбит И.Яковлев аатынан педагогическай университетка буолла. Манна биһиги дакылааппытын аахтыбыт, биһирэнэн, сертификатынан наҕараадаланныбыт. Киэһэ улуу Волга устун теплоходунан уһуннубут. Ааҕыылар үһүс күннэрэ академик Волков төрөөбүт сиригэр Большой Яльчик диэн селоҕа буолла. Манна салгыы үөрүүлээх арыйыы, дакылаат ааҕыылара, норуот маастардарын быыстапката, оскуолаҕа экскурсия буолла, улахан банкетынан түмүктэннэ. Дьэ мантан салгыы улуу киһи, сүдү педагог Г.Н.Волков олорбут, үлэлээбит сирдэринэн айаммыт саҕаланна, сир аайы кини үөрэнээччилэрэ үөрэ-көтө көрсөллөр, онон айаммыт былаһын тухары бэлэмҥэ, мааныга –далбарга сырыттыбыт. Ол курдук Татарстан киинигэр баай историялаах Казань куоракка сылдьан, былыргы тутуулары, мечеттэри, аныгылыы кварталлары астына көрдүбүт, татаардары кытта хомустаатыбыт, оһуокайдаатыбыт. Салгыы поеһынан айаннаан, Волгоград Герой - куоракка тиийэн, Улуу кыайыыга анаммыт сүдү монумеҥҥа кыргыһыы хонуутугар охтубут биир дойдулаахтарбыт сырдык ааттарыгар сүгүрүйэн, сахалыы сиэринэн арыылаах алаадьынан ытык сири аһаттыбыт, хомуска оонньоотубут. Улуу Сталинградтааҕы кыргыһыы панораматыгар сылдьан, биир дойдулаахпыт Г.Протодьяконовка анаммыт экспозицияны илэ харахпытынан көрөн дуоһуйдубут. Ити кэнниттэн Калмыкияҕа айаннаатыбыт. Элистаҕа биһигини Бүлүүгэ хаста да кэлэн барбыт ученай А.Б.Панькин ытыс үрдүгэр илдьэ сырытта, калмыктар историяларын, олохторун-дьаһахтарын сиһилии билистибит. Ону таһынан Калмыкия Государственнай Университетыгар, оннооҕор Калмыкия Республикатын үөрэҕириитин миниистиригэр приемҥа сырыттыбыт, бэлэх-туһах бөҕөнү туттубут. Илистиилээх айаммыт Сочи куруорт куоратыгар сынньалаҥынан түмүктэннэ. Хара муора сылаас долгунугар бигэннибит, итии күнүгэр дуоһуйа сыламнаатыбыт. Бу айаҥҥа этэҥҥэ сылдьан, элбэҕи билэн-көрөн, бэйэбит норуоппут историятын, олоҕун - дьаһаҕын, сайдыытын атын омуктарга билиһиннэрэн кэлэрбитигэр күүс-көмө буолбут гимназия салалтатыгар, чуолаан директор С.С. Семеновка, бухгалтерия үлэһиттэригэр, салайааччыбыт Е.К.Чиряевка барҕа махталбытын тириэрдэбит. З.Н.Сергина ТТКЭГ учуутала 
|
|
Просмотров: 608 |
Добавил: togus
| Рейтинг: 0.0/0 |
|
Календарь
| « Январь 2013 » | | Пн | Вт | Ср | Чт | Пт | Сб | Вс | | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | 31 |
|
